Luk 4 | ZomZIV | STEP | Jesu Khasiangtho tawh kidimin, Jordan panin ciah kika Kha in amah gamlakah a pi hi.

Luke 4

Jesu Kizia-etna

1 Jesu Khasiangtho tawh kidimin, Jordan panin ciah kika Kha in amah gamlakah a pi hi. 2 Tua lai-ah dawimangpa in ni sawmli sung a zia-et hi. Tua hun sungin amah in bangmah ne lo a, tua nite a bei khit ciangin a gil kial hi. ^a

3 Dawimangpa in ama kiangah, “Nang Pasian Tapa na hileh hih suang, anlum suaksak in,” a ci hi. ^b

4 Jesu in, “‘Mihingte anlum bekin nungta lo hi,’ ^{▼▼4.4 Tp. 8:3} ci-in kigelh hi.” ci-in a dawng hi.

5 Dawimangpa in munsang khatah amah paipih a, leitunga om kumpi gamte khempeuh thakhatin a lak hi. 6 Ama kiangah, “Thuneihna le a thupina teng khempeuh kei hong kipia zo hi. Ka piak nop peuh pia thei ka hi manin nang kong pia ding hi. 7 Tua ahi ciangin kei hong bia peuh lecin a vekin nang aa hi ding hi,” a ci hi. ^d

8 Jesu in, “‘Na Topa Pasian bia inla ama na bek sem in,’ ^{▼▼4.8 Tp. 6:13} ci-in kigelh hi,” ci-in a dawng hi.

9 Dawimangpa in amah Jerusalem ah paipih a biakinnpi khum dawnah a dingsak hi. Amah in, “Nang Pasian Tapa na hileh hih lai panin tuaksuk in. 10 Bang hang hiam cih leh:

“‘Nang tawh kisai-in limtaka nang hong cing dingin
amah in a vansawltakte thu pia ding hi:
11 na khepek suang tawh na tahkhak loh nadingin,
amaute in a khut uh tawh nang hong domto ding uh hi,’ ^{▼▼4.11 Ph. 91:11, 12} ci-in kigelh hi,” a ci hi.

12 Jesu in, “‘Na Topa Pasian na zia-et kei in,’ ^{▼▼4.12 Tp. 6:16} ci hi,” ci-in a dawng hi.

13 Dawimangpa in hih zia-etna teng khempeuh a man khit ciangin hun hoih a om kik mateng amah a nusia hi. ^h

Nazareth ah Jesu Kinolh

14 Jesu, Kha vangliatna tawh Galilee ah ciah kika, ama thu gamsung khua khempeuh ah a kizel hi. 15 Amaute synagogue-te sungah thu hilh a, mikim in amah a phat uh hi.

16 Amah a khanna khua Nazareth ah pai-a, ama ngeina bangin Sabbath ni-in synagogue ah a pai hi. Amah laisim dingin a dingto hi. 17 Kamsangpa Isaiah laizial amah kipia hi. Amah in tua laizial a phel leh: ⁱ

18 “Mizawngte tunga lungdamna-thu hilh dingin
keimah sathau hong nilh khin zo ahi manin,
Topa Kha ka tungah a om hi.
Amah in thongkiate suaktasak ding,
mittawte khua musak ding,
a kinengcipte khahkhia ding, ^j
19 Topa angvanna kum a tangko dingin, kei hong sawl zo hi,” ^{▼▼4.19 Isa. 61:1,2} ci-a kigelhna mun a mu hi.

20 A sim khit ciangin laizial zialin sawltakpa pia-in a tu hi. Jew-te synagogue sunga om mi khempeuh in amah mitkhah loin a en uh hi. 21 Tua ciangin amah in amaute kiangah, “Tuni-in hih Laisiangtho note zakin a tangtung hi,” a ci hi. ^l

22 Mi khempeuh in amah phatgen in a kam pana kamngaihte lamdang sa mahmah uh a, “Hih pa Joseph tapa hi lo ahi hiam?” ci-in a dong uh hi. ^m

23 Jesu in amaute kiangah, “‘Zato mangpa aw, nang le nang kidamsak in! Na khankhiatna Capernaum a na hih ka zakte uh hih lai-ah zong hong hih dih in,’ ci-in hih paunak tawh nong bulh tektek ding uh hi,” a ci hi. ⁿ

24 Amah in, “Thutak kong geninah, ama khua-a kisang kamsang khat beek a om kei hi. 25 Elijah hun lai-in kum thum le kum lang sung van kikhak-a, gamsung khempeuh ah a nasia mahmah kialpi a tun laitakin Israel gamah meigong tampi om hi, cih mantakin kong gen hi. 26 Tua hi napi Sidon kual Zarephath a meigongnu kiang longal adangte kiangah Elijah a kisawl kei hi. 27 Kamsangpa Elisha hun lai-in zong Israel gamah phak ^{▼▼4.27 Greek lai-ah vun natna khat peuhpeuh cihna hi a, phak cihna tektek hi tuan lo hi} natna a vei tampi a om hi. Tua hi napi Syria mi Naaman bek longal adang khat beek a kisiangsak kei hi,” ci-in a gen a zom lai hi. ^p

28 Synagogue sunga om mite khempeuh in hih thu a zak uh ciangin a lungham uh hi. 29 Amaute dingkhia in, khuapi pua-ah amah hawlkhia uh a, kenah khiatsuk dingin tua khuapi kiphuhna mualdawn kil ah amah a paipih uh hi. 30 Ahi hangin amah mihonpite kawmlak tawnin a gelkhia hi.

Jesu in Kha Gilo Khat Hawlkhia

31 Tua ciangin Galilee gam khuapi khat, Capernaum ah paisukin Sabbath ni-in mite kiangah thu a hilh hi. 32 Ama thuhilhna lamdang a sa mahmah uh hi; bang hang hiam cih leh a thuhilhna in thuneihna a nei hi.

33 Synagogue sungah kha gilo ^{▼▼4.33 Greek ah nin tg.36 ah zong} lut mi khat a om hi. Tuapa in a aw neihzah in, 34 “Ehei! Nazareth mi Jesu aw, kote bang hong cih nuam na hi hiam? Kote susia dingin hong pai na hi hiam? Nang kua na hi hiam, cih kong thei hi - Pasian’ Mi Siangtho na hi hi!” ci-in a kiko hi.

35 Jesu in khauhtakin, “Pau kei in! Ama sung pan paikhia in,” ci-in a sawl hi. Tua ciangin dawi in amaute khempeuh mai-ah tuapa a puksak khit ciangin amah liamsak loin a paikhia hi. ^r

36 Mi khempeuh in lamdang sa mahmah uh a, “Hih thuhilhna bang ahi hiam? Thuneihna le vang tawh kha gilote thu a piak ciangin paikhia mawk uh hi!” khat le khat a kici uh hi. 37 Tua ciangin tua kuam kimkot tengah ama thu a kizel hi. ^s

Jesu in Tampi Damsak

38 Synagogue panin Jesu paikhia a, Simon innah a hawh hi. Tua laitakin Simon sungnu nattun gim mahmah a, Jesu in amah a huh nading amaute in a ngen uh hi. 39 Tua ahi ciangin tuanu tungah kun a, nattun natna a tai leh a natna in amah nusiapah hi. Amah tho in amaute a zindo hi.

40 Nitum ciangin mipite in, natna tuamtuam a neite Jesu kiangah va paipih uh a, amah in amaute tungah khut nga kimin a damsak hi. 41 Tua tham loin mi tampite sung pan dawite paikhai a, “Nang Pasian Tapa na hi hi!” ci-in a kiko uh hi. Ahi hangin amah in amaute a tai hi. Tua dawite in amah Christ ^{▼▼4.41 Ahikeh Messiah} hi, cih thei uh ahi manin amaute pau ding Jesu in a phal kei hi.

42 Khuavak ciangin Jesu gamdaihna munah a pai hi. Mite in amah zong uh a, ama omna munah a tun uh ciangin amaute nusia lo dingin a kho uh hi. 43 Ahi hangin amah in, “Pasian gam lungdamna thu hilh dingin kei hong kisawl ahi manin khua dangte ah zong ka hilh pelmawh ding hi,” a ci hi. 44 Tua hi-a, amah in Judea ^{▼▼4.44 Ahikeh Jew-te gam; khutgelh pawlkhatah Galilee} gam synagogue-te sungah thu a hilhhilh hi. ^v